د خوست ولایت ګربزو ولسوالي د لېژي ذخیروي بند د لومړنیو چارو له بهیر څخه لیدنه وشوه
د خوست والي مولوي عبدالقیوم روحانی، د شمل خرم سیندیزې فرعي حوزې رئیس، مولوي عبدالقیوم ثابت؛ د ولایت مقام د دفتر رئیس رحمت الله سوبمن، د کار او ټولنیزو چارو رئیس مولوي میرصاحب جان، د نوموړې سیندیزې فرعي حوزې تخنیکي ټیم او یو شمېر سیمه اییزو مسؤولینو او مشرانو په ملتیا د خوست ولایت ګربزو ولسوالي اړوند د لېژي سیمې ذخیروي بند د لومړنیو چارو له بهیر څخه لیدنه وکړه.
د یادونې وړ ده چې نوموړی ذخیروي بند د ۵۱ متره اوږدوالي، د پلنوالي اندازه یې په بېخ کې ۳۹ متره او په پورتنۍ برخه کې ۴.۲۰ سانتي متره او ۱۶ متره لوړوالي په درلودلو سره د اوبو او انرژي وزارت په مالي لګښت د شمل خرم سیندیزې فرعي حوزې تر څارنې لاندې د څه د پاسه ۲۰ میلیونه افغانیو په لګښت جوړېږي.
نوموړی ذخیروي بند د ۹۵ زره متر مکعبه اوبو د ذخیره کولو ظرفیت لري او چارې به یې د یو کال په موده کې بشپړې او ګټې اخیستنې ته به وسپارل شي.
