د تګاب ولسوالي تر باغدرې برېښنا بند پورې د سړک جوړولو پروژې چارې بشپړې او د اوبو او انرژي وزارت د انرژي معین په شتون کې ګټې اخیستنې ته وسپارل شوه
د تګاب ولسوالي تر باغدرې برېښنا بند پورې د سړک جوړولو پروژې چارې د اوبو او انرژي وزارت د انرژي معین محترم الحاج ملا عبدالهادي یعقوب او ورسره مل پلاوي او د کاپیسا مرستیال والي محترم شیخ اسدالله سنان، د کاپیسا د اوبو او انرژي رئيس محترم انجنیر کاوه خروش، د ام، سي، سي، ام، جم شرکت مسؤل ښاغلي لي بین تائو، د تګاب ولسوال محترم مولوي خلیل الرحمن ابراهیم او یو شمېر نورو سیمه ایزو مسؤلینو په شتون کې ګټې اخیستنې ته وسپارل شوه.
نوموړی سړک د تېرو دریو میاشتو په موده کې د پورتنۍ، کښتنۍ او د بند محور څانګو ته وغځيد چې ۸ کیلو متره د باغدرې برېښنا بند تر محوره، ۱۰ کیلو متره د بند تر کښتنۍ او ۴ کیلو متره د بند تر پورتنۍ برخې پورې بشپړې او ګټې اخیستنې ته وسپارل شوه.
همدارنګه، د انرژي معین او ورسره مل پلاوي د باغدرې اوبیزې برېښنا بند د جیوفزیک او جیوتخنیک د امکان سنجي مطالعاتو د چارو له بهیره څخه څارنه وکړه او اړوندو مسؤلینو ته یې اړینې لارښوونې وکړې.
همدغه راز، محترم مولوي عبدالرحمن رحماني د پایدارې انرژي عمومي رئيس د باغدرې برېښنا بند د امکان سنجي مطالعاتو په هکله رسنیو ته اړین معلومات وړاندې کړل.
