د بتخاک نوی سب سټېشن او له ارغندۍ څخه تر بتخاک پورې د ۲۲۰ کېلو ولټ لېږد مزي پروژه د ۲۵.۴ میلیونه آمریکایي ډالرو په ټولیز ارزښت پرانیستل شوه
د دغو پروژو د پرانیستې مراسم د اوبو او انرژي سرپرست وزیر الحاج ملا عبداللطیف منصور، د کابل والي الحاج امین الله عبید، د انرژي معین الحاج ملا عبدالهادي یعقوب، د اطلاعاتو او فرهنګ وزارت نشراتي معین مهاجر فراهي، د اسلامي امارت مشرانو، د اوبو او انرژي وزارت سلاکارانو او رئیسانو او د ګڼ شمېر ځایي اوسېدونکو په شتون کې د بتخاک سب سټېشن په ساحه کې ترسره شوه.
د اوبو او انرژي سرپرست وزیر د دغې پروژې د پرانیستي پرمهال د هغې ارزښت ته په اشارې سره یادونه وکړه چې دغه پروژه د ترکمنستان-افغانستان د ۵۰۰ کیلو ولټ لېږد مزي د اړوندو پروژو په ټولګه کې شامله ده او د انرژي د جذب او وېش زیاته برخه له دغې سرچینې څخه چمتو کېږي.
ښاغلي منصور ټینګار وکړ چې د اوبو او انرژي وزارت د دوو مهمو او حیاتي سکټورونو مسؤولیت پر غاړه لري او له نېکه مرغه په دغه برخه کې یې د کتنې وړ فعالیتونه ترسره کړي دي.
په همدې حال کې د کابل والي څرګنده کړه چې د اسلامي امارت له راتګ سره تر اوسه له نېکه مرغه د هېواد په آبادۍ او پراختیا کې په ځانګړې توګه د کابل ښاریانو د برېښنا د تأمینولو په برخه کې لویې لاسته راوړنې ترلاسه شوې دي.
له بلې خوا د اوبو او انرژي وزارت د مقام سلاکار ډاکټر فاروق اعظم برېښنا د ننۍ ټولنې د اساسي اړتیاوو له جملې څخه وبلله او یادونه یې وکړه چې له نېکه مرغه د اوبو او انرژي وزارت لخوا په دغه لاره کې ملموس او ارزښتمن ګامونه اخیستل شوي.
په دوام کې د اطلاعاتو او فرهنګ وزارت معین مهاجر فراهي یادونه وکړه چې اسلامي امارت څرنګه چې د هېواد د آزادۍ لپاره هېڅ ډول سرښندنې ندي سپمولې، اوس مهال به د هېواد د آبادۍ او پراختیا په لاره کې هم شپه او ورځ هڅې کوي.
همدارنګه د عوفي بهرام شرکت رئیس حاجي پهلوان د دغې پروژې په پانګونې د خوښي په څرګندولو سره ټينګار وکړ چې نوموړی شرکت د انرژي په پروژو باندې د پانګونې د غځولو دوام ته ژمن دی.
د یادونې وړ ده چې دغه پروژه د اوبو او انرژي وزارت لخوا د عوفي بهرام خصوصي شرکت په پانګونې سره پلي کېږي.
د بتخاک نوي سب سټېشن د پروژې په پلي کولو سره په ټولیز ظرفیت د ۱۸۹ مېګا ولټ امپیر او له ارغندۍ سب سټېشن څخه د بتخاک تر نوي سب سټېشن پورې د ۲۲۰ کېلو ولټ لېږد مزي، د ترکمنستان ۵۰۰ کېلو ولټ لین څخه د انرژي لویه برخه جذب او د کابل د خلکو د برېښنا ستونزې به تر ډېره بریده حل شي.
