د اوبو پروژو د مدیریت د وضعیت د څېړلو او د پروژو د ستونزو د هوارولو په موخه د اوبو پروژو د مدیریت ناسته ترسره شوه
یاده ناسته د اوبو او انرژي وزارت د اوبو معین ښاغلي مجیب الرحمن عمر آخندزاده تر مشري لاندې د رئيسانو او د اوبو د مدیریت د سترو پروژو د مدیرانو په ګډون ترسره شوه.
په یاده ناسته کې، د کابل ولایت په شکر درې ولسوالي د شاه و عروس بند، په نیمروز ولایت کې د کمال خان بند، د هلمند ولایت د کجکي بند، د زابل ولایت د توري بند، د هرات ولایت د پاشدان بند، د فراه ولایت د بخش آباد بند او د تخار ولایت د نمک آب کانال د پروژو رئيسانو او مدیرانو هر یوه په خپل وار سره د پروژو د وضعیت د پرمختګ او د هغوی د ستونزو د هوارولو په هکله لازم معلومات د اوبو له معین سره شریک کړل.
همدارنګه د پروژو رئيسانو او مدیرانو د ناستې په بهیر کې د یادو پروژو د پاتې چارو د عملي کولو او د ستونزو د هوارولو په موخه خپل اندونه او وړاندیزونه وړاندې کړل.
د اوبو ښاغلي معین د موضوعاتو تر هر اړخیزې څېړنې او د مسؤلینو د اندونو او وړاندیزونو تر آورېدولو وروسته، د چارو د غوره والي او چټکتیا په موخه لازم هدایات او سپارښتنې وړاندې کړې.
د یادولو وړ ده، چې د پروژو د مدیریت ناستې تر دې مخکې هم څو ځله د اوبو ښاغلي معین تر مشري لاندې ترسره شوې او د پروژو د وضعیت د څېړلو او د هغوی د ستونزو د هوارولو په برخه کې د اړینو تصمیمونو په نیولو سره، غوره پایلې هم درلودلې دي.
