د اوبو معینیت اونېزه تخنیکي ناسته ترسره شوه
دغه ناسته د اوبو او انرژي وزارت د اوبو معین محترم مجیب الرحمن عمر آخندزاده تر مشري لاندې د رئيسانو، سلاکارانو او د اوبو سکتور د نورو تخنیکي مسؤلینو په ګډون ترسره شوه.
په دغه ناسته کې، د اوبو د مدیریت او تنظیم اړوند بېلابېلو موضوعاتو لکه: په لویو ښارونو کې د موټر وینځلو ځایونو کې د اوبو د بیاکارولو لپاره د اوبو د حلقوي تصفیې سیسټم تلازم، په موټر او غالي وینځلو ځایونو کې د ځمکې لاندې اوبو د مصنوعي تغذیې په موخه د جذبې څاګانو پلي کولو، په کابل ښار کې د غالي وینځلو د مرکزونو د فعالیت د څرنګوالي، په سیندیزو حوزو کې د چکډمونو د پروژو د ډیزاین څېړنه او د اوبو د تخصیص او د ځمکې لاندې اوبو سرچینو د مدیریت یو شمېر نورو موضوعاتو په هکله بحث او د اندونو تبادله وشوه.
د ناستې په بهیر کې، اړوندو رئیسانو د نوموړو موضوعاتو په هکله معلومات وړاندې کړل او په اړه یې د هر اړخیزې خبرو، اترو وروسته د هغوی په اړه اړین تصمیمونه ونیول شول او د اوبو د معین له لوري د چارو د غوره پرمخ وړلو په موخه اړینې سپارښتنې وشوې.
