د اوبو معینیت اونېزه تخنيکي ناسته ترسره شوه
دغه ناسته د اوبو او انرژي وزارت د اوبو معین محترم مجیب الرحمن عمر آخندزاده تر مشرې لاندې د رئيسانو، سلاکارانو او د اوبو سکتور د تخنیکي مسؤلینو په ګډون ترسره شوه.
په دغه ناسته کې د بېلابېلو موضوعاتو لکه: په پکتیا او خوست ولایتونو کې د ځمکې لاندې اوبو د څارنيزې شبکې پراختیا، په کابل ښار کې د زرغونتیا لپاره د ځمکې لاندې اوبو له سرچینو څخه د ګټې اخیستنې ستونزه، له کابل ښار څخه بهر د معدني اوبو شرکتونو، د غیر الکولي مشروباتو او شنوخونو د لېږد په هکله د اقتصادي کمېسیون د لسمې ګڼې پرېکړه لیک د پلي کولو د بهیر او د کابل ښار د اوبو د لوبو په حوضونو کې د اوبو د کارونې او لګښت د څرنګوالي په هکله بحث او د اندونو تبادله وشوه.
د نوموړو موضوعاتو په هکله د اندونو تر تبادلې وروسته، اړین تصمیمونه ونیول شول او د اوبو معینیت محترم مقام له لوري اړوندو ریاستونو ته د پر وخت اجراآتو په موخه اړین هدایات او لارښوونې وشوې.
