د اوبو د چارو د تنظیم په ملي اداره کې د ځمکې لاندې اوبو مدیریت د مقررې مسودې
د اوبو د چارو د تنظیم په ملي اداره کې د ځمکې لاندې اوبو مدیریت د مقررې مسودې نهایي کولو په موخه د همغږۍ ناسته
دغه جلسه د اوبو د چارو د تنظیم ملي ادارې د تخنیکي مرستيال انجنیر احمد ویس بصیري په مشرۍ؛ د دغې ادارې يو شمېر رئيسانو، د کرنې وزارت، ښار جوړونې او ځمکو وزارت، حج او اوقافو وزارت، کابل ښاروالۍ، نورم او سټنډرډ ادارې او يو شمېر نورو اړونده ادارو استازو ګډون درولود، د اوبو د چارو د تنظیم ملي اداره کې تر سره شوه.
د اوبو د چارو د تنظیم ملي ادارې تخنیکي مرستیال انجنیر احمد ویس بصيري د ځمکې لاندې اوبو د سرچینو ورځني استعمال يوه اساسي موضوع یاده کړه او له اړونده ادارو څخه یې غوښتنه وکړه، چې د هغه مديريت ته جدي پاملرنه وکړي.
ښاغلي بصیري د ځمکې لاندې اوبو د مدیریت مقررې د څرنګوالي په اړه لازم هدایت وړاندې کړل او وې ویل" په مقرره کې د اوبو تدابیرو موضوعات، د ښارونو پېژندنه، تخصص، خصوصي سکټور، د ادارو دندې او د تطبیق مېکانیزم باید په مشخص او واضح ډول تعریف شي"
په ورته وخت کې د اوبو د پالیسي رئيس انجنیر میرویس میرزاد لخوا د يو پرزينټېشن په واسطه ټولو ګډونوالو ته د ځمکې لاندې اوبو مدیریت د مقررې مسوده وړاندې شوه چې په اړه یې خبرې او د نظرونو تبادله وشوه.
