د اوبو او انرژۍ وزارت د اوبو مرستیال د هلمند ولایت والي او د هلمند سیندیزی فرعی حوزی رییس سره وکتل
د اوبو او انرژۍ وزارت د اوبو مرستیال ښاغلی انجنیر خان محمد تکل د هلمند ولایت والي تورن جنرال محمد یاسین او د هلمند سیندیزی فرعی حوزی رییس انجنیر محمد انور ذهین او د هلمند ولایت د سکتور نورو رئیسانو سره د غبرګولي په ۲۰ مه د دوشنبې په ورځ وکتل او په هلمند ولایت کې د اوبو مدیریت او کنټرول پروژې پراختیا په اړه خبرې وکړې.
په دې لیدنې کې د اوبو مرستیال په هلمند ولایت کې د اوبو او انرژۍ وزارت د روانو پروژو څخه یادونه وکړه او په هلمند کې د نړیوال بانک په همکارۍ د څلور تحکیماتی پروژې، د کارېز سربند او د بګت کانال څخه خبر ورکړ.
د هلمند ولایت والي پدې ولايت کې د پراختيايي پروژو د پلي کیدو څخه د اوبو او انرژۍ وزارت له مشرتابه څخه مننه وكړه او د کارېز کانال سربند جوړولو پروژه، په نهرسراج ولسوالۍ کې د ۲۹۴ مترو په اوږدوالی استنادی دېوال جوړولو پروژه، په ګرمسیر ولسوالۍ کې د ۶۸۰ مترو په اوږدوالی استنادی دېوال جوړولو پروژه او د درویشان کانال بیا رغونه پروژه، د ناوه ولسوالۍ په نگارین او گوهرگین کلیو کې د ۶۷۰ مترو په اوږدوالی استنادی دېوال جوړولو پروژه او د لشکرګاه ښار په بولان سیمه کې د ۴۲۰ مترو په اوږدوالی استنادی دېوال جوړولو پروژه د اوبو او انرژۍ وزارت ته وړاندیز وکړ ترڅو د دې وزارت په ۱۳۹۹ کال مالي پلان کې شامل شی.
دا په داسي حال کی دی چی په لومړي پړاو کې د گبیونی ۱۲ پروژې او دوهم پړاو کې د گبیونی ۸ پروژې د روان کال د اوبو او انرژۍ وزارت لخوا هلمند ولایت ته ځانګړې شوې وه.
