د اوبو او انرژي وزرات ستر سلاکار د جینیوا واټر هب له استازي او مل پلاوي سره وکتل
د اوبو او انرژي وزارت د مقام ستر سلاکار محترم ډاکټر فاروق اعظم د جینیوا واټر هب له استازي مارک زیتون او مل پلاوي سره چې په ترکیب کې یې په افغانستان کې د ملګرو ملتونو د اداري غړي هم شامل وو، وکتل او په افغانستان کې یې د اوبو او انرژي اړوند او د دغه وزارت د کارمندانو د مسلکي وړتیا لوړولو په هکله بحث او د اندونو تبادله وکړه.
په دغه لیدنه کې، د وزارت سلاکار د نوموړي بنسټ استازي ته د ښه راغلاست ترڅنګ، د افغانستان د اوبو اړتیاوې تشریح کړې او زیاته یې کړه، چې اوسمهال په ټول هېواد کې امنیت ټینګ دی او مناسب فرصت رامنځته شوی دی، چې نړیوالې ادارې په ځانګړې توګه د اوبو په برخه کې فعالې بشرپاله ادارې او نړیواله ټولنه د افغانستان د اوبو او انرژي وزارت سره د اوبو د مدیریت په برخه کې اړینه همکاري وکړي.
ښاغلي ډاکټر فاروق اعظم په دغه لیدنه کې د جینیوا واټر هب بنسټ او نړیوالې ټولنې څخه غوښتنه وکړه، چې له دغه وزارت سره د کارمندانو د مسلکي وړتیا لوړولو، تخنیکي، حقوقي او هایدروپولیتیکي برخو کې همکاري وکړي.
په ورته مهال، د جینیوا واټر هب استازي ژمنه وکړه، چې د اوبو او انرژي له وزارت سره به د خپلې ادارې امکاناتو ته په کتو سره اړینه همکاري وکړي.
