د اوبو او انرژي وزارت سرپرست وزیر ختیزو ولایتونو ته په سفر تللی دی
د ا.ا.ا د اوبو او انرژي وزارت سرپرست وزیر ښاغلی ملا عبداللطیف منصور د هیواد ختیزو ولایتونو ته په کاري سفر ولاړ.
نوموړی پرون د لغمان ولایت له والي ښاغلي قاري زین العابدین عابد، د ولایت مرستیال مولوي سیداحمد بنوري، امنیه قوماندان ښاغلي مولوي فیصل مختار، د لغمان سیندیزې حوزې رئیس ښاغلي مولوي شیرجان راشدی او غربي نورستان ولسوال ښاغلي شیخ زرمحمد سره لیدنه وکړه.
یادو مسؤلینو لمړی دوی ته ښه راغلاست ووایه، او وروسته یې د ختیزو ولایتونو په بیلابیلو مسایلو په تېره بیا د اوبو او انرژي په هکله مفصلي خبرې وکړې.
مسؤلینو د اوبو او انرژي په هکله شته ستونزې، اړتیاوي، وړاندیزونه او راتلونکي پلانونه له ښاغلي وزیر سره شریک کړل.
ښاغلي وزیر د دوی د ستونزو، اړتیاو، وړاندیزونو، روان کاري بهير او راتلونکو پلانونو تر اورېدو وروسته دوی ته ډاډ ور کړ، چې د دوی غوښتنو او وړاندیزونو ته به لمړیتوب ور کول کېږی.
د اوبو او انرژي وزارت سرپرست وزیر په دغه سفر کې د شاهي کانال د پروژې څخه لیدنه وکړه.
دغه راز، د اوبو او انرژي وزارت سرپرست وزیر ختیزو ولایتونو ته د خپل سفر په بهیر کې د نورستان کله ګوش سیمې څخه هم لیدنه وکړه.
نوموړي دغه سیمه د اوبو دیوه بند د جوړولو لپاره مناسبه نقطه وبلله او ویې ویل چې د دغه بند جوړول زمونږ د راتلونکي پلانونو یوه برخه ده چې په جوړېدو سره به یې د خلکو د ځمکو خړوبولو تر څنګ د ۸۰ میګاواټه برېښنا د تولید ظرفیت هم و لري..
د اوبو او انرژي وزارت سرپرست وزیر د سیندیزې فرعي حوزې رئيس مولوي شیرجان راشدي او د ولایت مالي او اداري رئیس مولوي جمال الدین هاشمي په ملتیا د مهتر لام بابا زیارت ته لاړل، او د بابا صاحب له دښتې څخه یې لیدنه وکړه، ویې ویل چې د شاهي کانال په جوړیدو سره به دغه دښته آباده او زرغونه شي.
د اوبو او انرژي وزارت سرپرست وزیر د لغمان ولایت له مسؤلینو سره تر خدای پاماني وروسته د ننګرهار ولایت روان شو.
