د اوبو او انرژي وزارت سرپرست وزیر او د دې وزارت د اوبو معین د لغمان ولایت والي او یو شمیر مشرانو سره وکتل
د اوبو او انرژي وزارت سرپرست وزیر ښاغلي ملا عبد اللطیف منصور او د دې وزارت د اوبو معین ښاغلي انجنیر مجیب الرحمن عمرپه خپلو کاري دفترونو کې د لغمان ولایت والی ښاغلي قاري زین العابدین، د سیندیزې حوزې مسؤلینو او د هغه ولایت یو شمیر قومي مشرانو سره وکتل.
په دې لیدنه کې د لغمان ولایت والي د هغه ولایت د خلکو وړاندیزونه او ستونزې د اوبو او انرژي وزارت د رهبرۍ مقاماتو سره شریک کړه، او د شاهي کانال پروژې د تطبیق په برخه کې د وزارت د رهبرۍ د توجه غوښتوونکي شول.
د اوبو او انرژی وزارت سرپرست ښاغلي ملا عبداللطیف منصور او د دې وزارت د اوبو معین ښاغلي انجنیر مجیب الرحمن عمرد لغمان ولایت د شاهي کانال پروژې د کار دوباره شروع په اړه د هغه ولایت والي او مشرانو ته ډاډ ورکړ. د اوبو او انرژي وزارت سرپرست په دې لیدنه کې وویل: یاده پروژه د اوبو او انرژي وزارت کاري لمړیتوب کې قرارلري، د هغې دوباره کار شروع په اړه لازمه امادګي او ګامونه پورته شوي دي، مونږ هڅه کوو چې د مالیې وزارت سره په همغږۍ په نیږدې راتلوونکې کې د دې پروژې کار شروع کړو.
د یادونې وړ ده چې د لغمان ولایت د شاهي کانال پروژه د اوبو او انرژي وزارت یوه له لویو پروژو څخه ده، چې د هغې په تطبیق سره به په زرګونه هکټاره کرنیزه ځمکه خړوبه شي.
