د اوبو او انرژي وزارت د ۱۸۰ پروژو په تطبیق سره د ۱۳۰۰ ټنه څخه زیات غنم د کابل اوسیدونکو ته وویشل شول
دا پروګرام چې دابو او انرژي وزارت لخوا د غذایي بحران له منځه وړلو او کار پیدا کیدو په موخه په لاره اچول شوی وو د کابل ولایت د شکردرې، ګلدرې، استالف او فرزې ولسوالیو کې تطبیق شو.
د کار په مقابل کې غنمو د توزیع پروګرام د اوبو او انرژي وزارت د انرژي برخې معین ښاغلي مولوی عارف الله عارف، د کابل سیندیزې حوزې لوی رئیس انجنیر حبیب الرحمن حقپال، د کابل فرعي وسطي سیندیزې حوزې رئیس مولوی ولی محمد تائیب او د دې وزارت یو شمیر نورو مسؤلینو لخوا افتتاح شوه.
د اوبو او انرژي وزارت د انرژي معین ښاغلي مولوی عارف خلکو ته د غنمو د توزیع پر وخت د دولت مسؤلین د جامعې خدمتګاران یاد کړه، او د صادقانه خدماتو وړاندې کول یې د دې مسؤلینو اساسي دنده یاد کړه، او په خپلو خبرو کې د عام المنفعه پروژو د تطبیق په برخه کې د خلکو له همکاریو څخه مننه وکړه.
په همدې حال کې د کابل سیندیزي حوزې لوی رئیس انجنیر حبیب الرحمن حقپال د دې پروګرام د اهمیت په اړه خبرې وکړې او زیاته یې کړه: د دې پروګرام په تطبیق سره په ټولیز ډول د کانال پاکونې او اوبو مدیریت ۱۸۲ پروژې تطبیق شوي دي او سلګونو خلکو له هغې ګټه اخیستې ده.
د یادونې وړ ده چې د دې پروګرام په تطبیق سره ۱۳۱۵۸۰ ورځې کار پیدا او د هغې په مقابل کې کارکوونکو ته په ټولیز ډول ۱۳۴۵ ټنه غنم وویشل شول چې ۱۳۴زره څخه زیاتو خلکو له هغې ګټه واخیسته.
