د اوبو او انرژي وزارت د رهبري ناسته له پوهنتونونو سره د علمي او کاري اړیکو د پراختیا او د وزارت د اجراآتو د ښه والي په موخه ترسره شوه
یاده ناسته د اوبو او انرژي وزارت د سرپرست وزیر ښاغلي ملا عبداللطیف منصور، د وزارت د اوبو معین ښاغلي مجیب الرحمن عمر آخندزاده او د دې وزارت د عمومي رئيسانو په ګډون ترسره شوه.
په دې ناسته کې، د اوبو او انرژي وزارت د کاري او علمي اړیکو پراختیا په هکله د لوړو زده کړو وزارت او د هېواد له پوهنتونو سره د اړیکو پراخولو او همدارنګه د اوبو او انرژي وزارت سرپرست وزیر ته د اوبو او انرژي معینیتونو د ربعوارو کړنو د وړاندې کولو په تړاو بحث او د نظر تبادله وشوه.
د اوبو او انرژي وزارت سرپرست وزیر ښاغلي ملا عبداللطیف منصور له پوهنتونونو سره د کاري او علمي اړیکو پراختیا اړینه وبلله او ټینګار یې وکړ، چې د یادو اړیکو د لا ښې پراختیا او د ګډو همکاریو د ترسره کولو لپاره د اوبو او انرژي وزارت، علمي کادرونو او د پوهنتون د زده کړیالانو د مسؤلینو ترمنځ د اوبو او انرژي په هکله د علمي او څېړنیزو څېړنو د ترسره کولو په موخه د لوړو زده کړو وزارت سره د همکاري هوکړه لیک لاسلیک شي؛ ترڅو د یاد هوکړه لیک سره سم د کاري او علمي اړیکو کچه د دواړو وزارتونو ترمنځ پراخه شي.
همدارنګه په یاده ناسته کې پرېکړه وشوه، چې د اجراآتو د ښه والي لپاره د هر معینیت د ټولو کاري څانګو دکړنو راپور په هر ربع کې یوځل د اړوندو عمومي رئيسانو له خوا د جلاجلا پرزینټیشنونو په ترڅ کې د اوبو او انرژي وزارت د سرپرست وزیر حضورته وړاندې شي او د یادو راپورونو مستندونه د څارنې او ارزونې ریاست له خوا تر څېړنې او ارزونې لاندې ونیول شي.
