د اوبو او انرژي وزارت د اوبو معین د اوبو د تنظیم کړنلارو او مقررو په نهايي کولو ټینګار وکړ.
د اوبو معینیت په همدې اونیزه تخنیکي ناسته کې چې د اوبو معین ښاغلي انجنیر مجیب الرحمن عمر تر ریاست لاندې د دې وزارت د اوبو برخې رئیسانو په ګډون ترسره شوه د اوبو کړنلارو او مقررو په نهایي کولو او د ۴۲ بندونو پروژو د قرارداد د تطبیق او بیا کتنې په اړه بحث او نظرونو تبادله وشوه.
په دې ناسته کې د اوبو اوانرژي وزارت د اوبو معین ښاغلي مجیب الرحمن عمر د اوبو کړنلارو او مقررو نهايي کولو او د کابل ښار د اوبو رسونې د شبکو په سروې او نظارت ټینګار وکړ.
ښاغلي عمر د اوبو سرچینو مسؤلینو ته دنده ورکړه چې د کابل ځمکې لاندې اوبو د کیفیت ټېسټ په ترسره کولو سره یو مفصل راپور چمتو او د رسنیو له لارې خپور کړي.
همدا شان د اوبو معین د دې وزارت د ۴۲ بندونو قرارداد د بیا کتنې او تطبیق په اړه اړونده مسؤلینو ته دنده وسپارله چې د تدارکاتو ریاست او د وزارت حقوقي مشاوریت سره په همغږۍ د یادو قراردادونو وضیعیت په یوه ګډه ناسته کې په مفصل ډول وڅیړي، او خپل راپور د لازم تصمیمونو لپاره د وزارت مقام له رهبرۍ سره شریک کړي.
د اوبو او انرژي وزارت
