د اوبو او انرژي وزارت د اوبو معین د افغان – ترک شرکتونو د ټولنې له یو شمېر مسؤلینو سره په افغانستان کې د پانګونې او د اوبیزو پروژو د پلي کولو په هکله خبرې، اترې وکړې
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې د افغان – ترک شرکتونو د مسؤلینو له یوې ټولنې سره وکتل.
په دغه لیدنه کې، د نوموړې ټولنې مسؤلینو وویل، لېواله دې چې په افغانستان کې په بېلابېلو برخو په ځانګړې توګه په اوبیزو پروژو کې پانګونه وکړي.
د اوبو معین د دغه لېوالتیا هر کلی وکړ او په هېواد کې د اوبو په پراختیایي پروژو کې د پانګونې لپاره د هغوی د هڅولو ترڅنګ ډاډ ورکړ، چې د اوبو او انرژي وزارت په دې برخه کې هر ډول اړینې همکاري ته چمتو دی.
هغه ټینګار وکړ، چې اوسمهال په افغانستان له هره پلوه د پانګونې لپاره زمینه چمتو ده او د اسلامي امارت مسؤلین به هم په ټینګ هوډ سره د اړینو شرایطو د چمتوکولو په برخه کې له پانګوالو سره همکاري وکړي.
