د اوبو او انرژي وزارت د اوبو معینیت په اونیزه تخنیکي ناسته کې څو اړین تخنیکي موضوعات تر څېړنې او بحث لاندې ونیول شول

یاده ناسته د اوبو او انرژي وزارت د اوبو معین محترم مجیب الرحمن عمر آخندزاده تر مشرې لاندې د رئيسانو، سلاکارانو او د اوبو سکتور د یو شمېر انجنیرانو په ګډون ترسره شوه.

په دې ناسته کې  د هېواد د اوبېزو سرچینو د وضعیت  او ورباندې د اقلیمي بدلونونو د اغیزو په هکله بشپړ معلومات د یوه پرزنټیشن په ترڅ کې وړاندې شول او د ستونزو، خنډونو او د حل لارو چارو په هکله یې په هر اړخیزه توګه بحث او د اندونو تبادله وشوه.

همدارنګه د ناستې په دوام کې د څو نورو اړینو تخنیکي موضوعاتو لکه په کابل ښار کې د اوبو د سپما په هکله د پوهاوي ورکولو، د شاه او عروس بند د اوبو رسولو د مطالعاتو امکان سنجي چارو د پر مخ وړلو، د سردې بند د مطالعاتو امکان سنجي،  له پنجشیر څخه کابل ته د اوبو لېږد پروژې د مطالعاتو او ډیزاین چارو د څېړنې او اوبو مدیریت پورې اړوندو نورو موضوعاتو باندې بحث او د اندونو تبادله وشوه.

د اوبو ښاغلي معین د یادو موضوعاتو تر څېړلو وروسته، د هغوی د لا ښه پلې کولو په موخه اړوندو مسؤلینو ته اړینې سپارښتنې وکړې.