د اوبو او انرژي وزارت د انرژي معین د سرپل ولایت له والي سره وکتل
د اوبو او انرژي وزارت د انرژی معین ښاغلی مولوي عارف الله" عارف" نن د خپل کار په دفتر کې د سرپل ولایت له والي ښاغلي مولوي محمد یعقوب سره ولیدل او په یاد ولایت کې د برېښنا رسونې د پروژو او د اوبو د بندونو د جوړولو په هکله بحث او د نظر تبادله وکړه.
په دغه لیدنه کې، د اوبو او انرژی وزارت د انرژي معین د سرپل ولایت والي ته ښه راغلاست وویل او په هېواد کې د امنیت د ټینګیدو په یادولو سره یې څرګنده کړه، چې اوس هغه وخت را رسیدلی دی چې ټول د هېواد په آبادۍ کې ونډه واخلو.
په ورته وخت کې، د سرپل ولایت والي د اوبو او انرژي وزارت د انرژي له معین څخه وغوښتل، ترڅو په یاد ولایت کې د اوبو لویو او وړوو بندونو د جوړولو او برېښنا رسولو کې پاملرنه وکړي.
له بلې خوا، د اوبو او نرژي وزارت د انرژي معین ښاغلی مولوي عارف الله عارف د سرپل والي ته ژمنه ورکړه،چې د اوبو او انرژي وزارت د بودجې په پام کې نیولو سره د هېواد په ټولو ولایتونو کې د تبعیض پرته هڅه کوي چې هغه ځایونه چې د برېښنا څخه محروم دي، د اوبو بندونو چارې پیل او د برېښنا رسونې پروژې چټکې کړي.
