د اوبو او انرژي سرپرست وزیر په افغانستان کې د ملګروملتونو (یو، این، ډي، پي) سازمان د پراختیا او پرمختګ برنامې له مسؤل سره د اوبو او انرژي په پروژو کې د همغږي او پراختیا د همکاریو په هکله بحث او د اندونو تبادله وکړه
د اوبو او انرژي سرپرست وزیر محترم الحاج ملا عبداللطیف منصور په افغانستان کې د ملګروملتونو(یو، این، ډي، پي) سازمان د پراختیا او پرمختګ برنامې له مسؤل ښاغلي استیفین او د دغه بنسټ له یو شمېر نورو مسؤلینو سره وکتل.
په دغه لیدنه کې، د اوبو او انرژي سرپرست وزیر په هېواد کې د اوبو او انرژي د پروژو حیاتي ارزښت ته په اشارې سره وویل، چې په اوسنیو شرایطو کې په هېواد کې د اوبو د مدیریت او د انرژي د پراختیايي پروژو پلي کول د افغانستان د خلکو تر ټولو اړینه اړتیا ده.
ښاغلي منصور ټینګار وکړ، چې په افغانستان کې د ټولو نړیوالو او بشري حقونو بنسټونو څخه تمه ده، چې نه یوازې په ژمنه بلکې په عمل کې د افغانستان له خلکو سره د انرژي د پراختیا او د اوبو رسولو د پروژو په برخه کې مرسته وکړي.
د اوبو او انرژي سرپرست وزیر د کابل- پنجشیر د اوبو لېږد پروژې ته په اشارې سره د نوموړې برنامې مسؤلینو ته وړاندیز وکړ، چې د دغې پروژې د تمویل په برخه کې د اوبو او انرژي له وزارت سره همکاري وکړي؛ ځکه چې دغه پروژه د کابل ښار د اوسېدونکو لپاره حیاتي ده او د پلي کولو زمینه یې هم له هره پلوه چمتو ده.
په ورته مهال، د وزارت د رهبري مقام یادونه وکړه، چې د نوې کېدو وړ انرژي د پروژو د پلي کولو په برخه کې ټاکل شوې ده، چې له ټولو اړوندو بنسټونو څخه یوه ګډه کمېټه رامنځته شي چې په رامنځته کولو کې به یې په دې برخه کې اړینې آسانتیاوې چمتو شي.
همدغه راز، د نوموړې برنامې مسؤل هم په افغانستان کې د اوبو او انرژي په برخه کې د ټولګټو پروژو په برخه کې د خپلو کړنو په هکله معلومات وړاندې کړل او د اوبو او انرژي له وزارت سره یې د خپلو همکاریو د پراختیا په برخه کې ژمنه وکړه. هغه همدارنګه د نوې کېدو وړ انرژي د کمېټې لپاره د تخنیکي او مالي همکاریو په ترسره کولو کې هم ډاډ ورکړ.
