د اوبو او انرژي سرپرست وزیر د چین هېواد له سفیر سره وکتل
د اوبو او انرژي سرپرست وزیر محترم الحاج ملا عبداللطیف منصور په افغانستان کې د چین هېواد له سفیر محترم جاو شینګ سره وکتل او په یوه غوڼده کې په داسې حال کې چې د اوبو معین محترم مجیب الرحمن عمر آخندزاده، د دغه وزارت د مقام سلاکار محترم ډاکټر فاروق اعظم او یو شمېر تخنیکي مسئولینو هم شتون درلود، د اوبو او انرژي په برخه کې د پروژو د پلي کولو لپاره د ګډو همکاریو په هکله خبرې، اترې وکړې.
په دغه غونډه کې دواړو لورو د دواړو هېوادونو ترمنځ غوره اقتصادي او سوداګریزو اړیکو ته په اشارې سره، د ګډو همکاریو د پراختیا په ځانګړې توګه په لوګر ولایت کې د مس عینک پروژې د اړتیا وړ برېښنا د چمتو کولو لپاره په کاپیسا ولایت کې د باغدرې برېښنا بند او د سروبي 2 برېښنا بند په پروژو کې د پانګونې په هکله بحث او د اندونو تبادله وکړه.
د اوبو او انرژي سرپرست وزیر د مس عینک پروژې د اړتیا وړ برېښنا د چمتو کولو په برخه کې د نوموړو پروژو پلي کول اړین وګڼل او ډاډ یې ورکړ، چې د اوبو او انرژي وزارت د دغو پروژو د پلي کولو لپاره اړین چمتووالی لري.
ښاغلي منصور د عملي کارونو د پیل په موخه د چارو پر چټکتیا باندې ټینګار وکړ او یادونه یې وکړه، چې که چینایي شرکتونه د نوموړو پروژو په پلي کولو کې اړین جدیت او هوډ وښیې دغه وزارت به په راتلونکي کې له چینایي شرکتونو سره د پانګونې لپاره د لازیاتو پروژو تړونونه لاسلیک کړي.
په ورته مهال، د چین سفیر هم د یادو پروژو د پلي کولو په برخه کې د وزارت رهبري مقام ته د همکاري ډاډ ورکړ او ژمنه یې وکړه، چې چینایي شرکتونه به پر نوموړو پروژو باندې د پانګونې لپاره اړین اقدامات ترسره کړي.
