د اوبو او انرژي سرپرست وزیر د قوش تیپې کانال د لومړي فاز د بشپړېدو او د دوهم فاز پيل د افغانستان د خلکو لپاره یو ښه زیری وباله
د اوبو او انرژي سرپرست وزیر محترم الحاج ملا عبداللطیف منصور چې د قوش تیپې کانال د لومړي فاز د بشپړېدو او د دوهم فاز د پيلېدو په مراسمو کې خبرې کولې، د دغې پروژې د لومړي فاز بشپړېدل دافغانستان د خلکو لپاره د کرنې او اقتصاد په برخه کې یوه ارزښتناکه لاسته راوړنه وبلله او همدارنګه یې د دغې پروژې د دوهم فاز د چارو پیل د افغانستان د مظلومو خلکو لپاره د یوه ښه زیري په توګه یاد کړ.
د اوبو او انرژي سرپرست وزیر په هېواد کې د اقلیم بدلونونو د اغېزو او وچکالي وضعیت ته په نغوتې( اشارې) سره د دغې پروژې پلي کول د افغانستان د خلکو لپاره حیاتي وګاڼه او ټینګار یې وکړ، چې د قوش تیپې کانال د کوم هېواد په زیان نه دی او د یوې ملي پروژې په توګه د افغانستان د خلکو مسلم حق دی. هغه زیاته کړه، د افغانستان اسلامي امارت او خلک هوډمن دي چې د هېواد له طبیعي سرچینو څخه په ګټې اخیستنې سره د خپل دې مسلم حق څخه هم په هوښیارۍ سره ګټه پورته کړي.
ښاغلي منصور په خپلو خبرو کې پر حکومت باندې د ملت د حقوقو او پر ملت باندې د حکومت حقوقو ته په لنډه توګه اشاره وکړه او د افغانستان خلکو ته یې ډاډ ورکړ چې هېواد د آبادي او غوړېدو په لور روان دی او د افغانستان اسلامي امارت مسؤلین په دې لاره کې شپه او ورځ هڅه کوي چې ملت ته د اقتصادي پراختیا او سوکالي زمینه چمتو کړي او له خلکو څخه یې وغوښتل چې په خپلو دعاوو او هر اړخیزې همکاري سره په دې لاره کې د مسؤلینو مرسته وکړي.
