د اوبو او انرژي سرپرست وزیر د حضرت عمر فاروق رضی الله عنه له دارالایتام څخه د فارغ شوو حافظانو په فراغت غونډه کې ګډون وکړ.
د اوبو او انرژي سرپرست وزیر محترم الحاج ملا عبداللطیف منصور تېره ورځ د میدان وردګو ولایت د سیدآباد والسوالۍ تنګي درې د حضرت عمر فاروق رضی الله عنه دارالایتام څخه د فارغ شوو حافظانو د دستاربندي په مناسبت هغه غونډه کې ګډون وکړ چې د اوبو او انرژي وزارت د اوبو معین محترم مجیب الرحمن عمر آخندزاده، د میدان ورګو والي قاري بختیار معاذ او ګڼ شمېر قومي مخورو، علمي او جهادي شخصیتونو او د سیمې اوسیدونکو پکې برخه اخیستې وه.
دا چې په نوموړي دارالایتام کې په سلګونو تنه یتیمان په عصري او دیني زده کړو بوخت دي، تېره ورځ د حافظانو فراغت غونډه ترسره شوه.
د اوبو او انرژي سرپرست وزیر د حافظانو کورنیو ته د مبارکۍ تر څنګ د یتیمانو پالنه خپله دیني او ملي وجیبه وبلله او ټینګار یې وکړ چې په نوموړې برخه کې به هر اړخیزه مرسته کوي او د یتیمانو پالنه یې د ټولنې د هر فرد مسؤلیت وبالهٔ.
دا چې د نوموړي دالایتام رغنیزې چارې د اوبو او انرژي وزارت د اوبو معین محترم الحاج انجنیر مجیب الرحمن عمر آخندزاده په مالي ملاتړ پیل شوې وې؛ د جومات، کمپیوټر لب او د دارالایتام ودانۍ په شمول بشپړې او ګټه اخیستنې ته وسپارل شو.
