د اوبو او انرژي سرپرست وزیر د ترکمنستان هېواد له پلاوي سره د دواړو هېوادونو ترمنځ د ګډو پروژو په هکله خبرې وکړې
د اوبو او انرژي سرپرست وزیر الحاج ملا عبداللطیف منصور په یوې ناستې کې د ترکمنستان هېواد د انرژي د نړیوالو پروژو له رئيس محترم مراد ارتیکوف سره د ټاپ سیمه ییزې پروژې، د برېښنا د انتقالي مزو پروژې او د نورالجهاد سب سټیشن پروژې په هکله بحث او د اندونو تبادله وکړه.
د اوبو او انرژي سرپرست وزیر په دغه ناسته کې د نوموړو پروژو د ارزښت د یادونې ترڅنګ د هغوی د پلي کولو په برخه کې د همکاري ژمنه وکړه.
ښاغلي منصور ټینګار وکړ، غوره ده چې د ټاپ پروژې د پلي کولو په برخه کې د همغږۍ په موخه ډېر ژر د درې واړو هېوادونو( ترکمنستان، افغانستان او پاکستان) ترمنځ ګډه ناسته جوړه شي.
په ورته مهال، د ترکمنستان هېواد د انرژي د نړیوالو پروژو رئيس د ټاپ سیمه ییزې پروژې په هکله د درې اړخیزې ناستې د وړاندیز په تائید سره د اوبو او انرژي سرپرست وزیر ته ډاډ ورکړ، چې د ترکمنستان هېواد له افغانستان سره د ګډو همکاریو دوام او پراختیا ته ژمن دی.
ښاغلي مراد د برېښنا د انتقالي مزو پروژو د چارو د پرمختګ وضعیت غوره وګاڼه او څرګنده یې کړه، تمه ده چې د نورالجهاد سب سټیشن او د هرات ولایت د ۱۱۰ کیلو ولټ انتقالي مزي چارې تر راتلونکي ژمي پورې بشپړې شي.
