د انرژي معینیت د ځینو اړینو موضوعاتو د څېړنې په موخه د یاد معینیت اداري ناسته ترسره شوه
یاده ناسته د وزارت د دفتر عمومي رئيس او د انرژي معینیت وارسي کوونکي محترم قاري محمد عبدالعزیز عزیز تر مشرې لاندې د یاد معینیت د رئيسانو او ټولو تخنیکي مسؤلینو په ګډون ترسره شوه.
په دې ناسته کې، د یو شمېر اړینو موضوعاتو په ځانګړې توګه د انرژي سکتور د پراختیا لپاره د پنځه کلن عملیاتي پلان کار د پیل په هکله چې په هېواد کې د انرژي د تنظیم، پراختیا، ودې، وېش او متوازن لېږد لپاره چمتو شوی دی، بحث او د اندونو تبادله ترسره شوه او اړوندو مسؤلینو ته د هغه د غوره پلي کولو په هکله اړین هدایات ورکړل شول.
د ناستې په دوام کې، د کلیو پراختیا وزارت په همکاري سره د وړو پروژو د پلې کولو، د میدان وردګ ولایت په جغتو ولسوالي کې د مایکرو هایدرو پارو دستګاه، په بدخشان ولایت کې شورابک بند پروژې د څېړلو او د نورو بېلابېلو تخنیکي موضوعاتو په هکله خبرې اترې وشوې.
د وزارت د دفتر عمومي رئيس او د انرژي معینیت وارسي کوونکي محترم قاري محمد عبدالعزیز عزیز، د ناستې د غړو د اندونو تر اورېدلو وروسته، د عملیاتي پلان د چارو دچټکتیا او د انرژي سکتور د پنځه کلن پلان د پلي کولو لپاره په اغېزمنو هڅو باندې ټینګار وکړ او اړوندو مسؤلینو ته يې مشخصي دندې وسپارلې.
