د انرژي معینیت اونیزه تخنیکي ناسته ترسره شوه
یاده ناسته د اوبو او انرژي وزارت د انرژي معین ښاغلي ملا محمد عیسی ثاني تر مشري لاندې د یاد معینیت د رئيسانو، سلاکارانو او یو شمېر تخنیکی مسؤلینو په شتون کې ترسره شوه.
په دې ناسته کې د یاد معینیت پر څو اړینو تخنیکي موضوعاتو لکه: د برېښنا تعرفې وروستي کول، د پانګونې په موخه د انرژي پروژو اعلان ته سپارل او یو شمېر نورو تخنیکي او اداري موضوعاتو په هکله بحث او د نظر تبادله وشوه.
د انرژي معین د تېرو ناستو د پریکړو په هکله د مسؤلینو او رئيسانو د راپورونو د اجراآتو تر څېړلو وروسته، د برېښنا شرکت سره د برېښنا تعرفې د وروستي کولو، په پکتیکا ولایت کې د ۵ میګاواټه لمریزې برېښنا پروژې د لومړي فاز اعلان ته سپارلو او د جوزجان ولایت په قرقین او خماب ولسوالیو کې د برېښنا رسولو پروژې په هکله اړین هدایات ورکړل.
د یادولو وړ ده، چې دا تخنیکي ناستې په اونۍ کې یوځل ترسره او پکې د انرژي څانګې تر ټولو اړینو موضوعاتو باندې بحث او د نظر تبادله کېږي او د لازمو اقداماتو د ترسره کولو په موخه اړین تصمیونه نیول کېږي.
