د سرپل ولایت د سلطان ابراهیم بند او د ارزګان ولایت د آغاجان بند په هکله د اقتصادي کمېسیون د مصوبې د پلي کولو په موخه د همغږۍ ناسته ترسره شوه
دغه ناسته د اوبو او انرژي سرپرست وزیر محترم الحاج ملا عبداللطیف منصور، د کانونو او پټرولیم سرپرست و زیر محترم شیخ شهاب الدین دلاور، د صنعت او سوداګري سرپرست وزیر محترم نورالدین عزیزي، د مالیې وزارت مالي معین محترم حاجي عبدالقدیر احمد، د ملي پراختیا شرکت رئيس محترم عبدالرحمن عطاش، رئيسانو او یو شمېر تخنیکي مسؤلینو په ګډون ترسره شوه.
په دغه ناسته کې، د افغانستان اسلامي امارت د اقتصادي کمېسیون د مصوبې پر بنسټ په سرپل ولایت کې د سلطان ابراهیم بند او په ارزګان ولایت کې د آغاجان بند د چارو د پیل لپاره د زمینې د چمتو کولو په موخه د اړینو همغږیو په هکله بحث او د اندونو تبادله وشوه.
د ناستې په بهیر کې، د نوموړو موضوعاتو تر مطالعې او څېړلو وروسته، اړین تصمیمونه ونیول شول او اړوندو وزارتونو د اقتصادي کمېسیون د مصوبې د پلي کولو په هکله خپل چمتووالی څرګند کړ. د ناستې په دوام کې همدارنګه هوکړه وشوه چې د پروژو لومړني مطالعات دې د اوبو او انرژي وزارت له لوري د نورو اړوندو ادارو په همکاري پیل شي.
