جوزجان ولایت کې د زراعتي اوبو د یو ستر کانال د جوړولو چارې پیل شوې
د جوزجان ولایت په آقچې ولسوالي کې د کلته شاخ زراعتي اوبو کانال چارې د ۵ میلیونو او ۲۰۰ زره افغانیو په ارزښت د کلیو د تلپاتې پراختیا په چوکاټ کې چې د ناروي هېواد په مالي ملاتړ د اکتید دفتر له خوا جوړیږي، پيل شوې.
د جوزجان سیندیزې حوزې رئيس ښاغلي ملا سعدالدین سلیمي وایي چې د دې پروژې پلي کول د آقچې ولسوالي د اوسیدونکو لپاره چې زیاتره یې په کرهڼې او مالداري باندې بوخت دي، د ډېر ارزښت وړ ده.
د هغه په وینا مخکي تر دې چې دا پروژه په لاره واچول شي، خلک له ډېرو ستونزو سره لاس او ګریوان ول او د یاد کانال په جوړولو سره به خلک ډېرو آسانتیاو ته لاسرسی ومومي.
دا کانال ۸۴ زره جریبه کرنیزه ځمکه تر پوښښ لاندې راولې او ۸ زره کورنۍ په مستقیم ډول د هغې له اوبو څخه برحمنې کېږي.
یاد کانال ۱۵۳ متره اوږدوالی لري چې په پاخه او اساسي ډول جوړیږي.
