د هریرود مرغاب سیندیزې حوزې عمومي رئیس د هرات ولایت پشت کوه او زاول ولسوالیو ته سفر وکړ
د هریرود مرغاب سیندیزې حوزې عمومي رئیس محترم الحاج مولوي سید عبدالسلام مستوفي آغا او ورسره مل تخنیکي ټیم د هرات ولایت په پشت کوه او زاول ولسواليو کې د اوبو بندونو د جوړولو لپاره د مناسبو سیمو د څیړلو په موخه نوموړو ولسوالیو ته سفر وکړ.
د دغه سفر په ترڅ کې د هریرود مرغاب سیندیزې حوزې عمومي رئیس د شینډنډ سیند اړوند د کادانک او د واخل سیند اړوند د واخل او تورلکه له سیمو څخه چې د اوبو بندونو د جوړولو لپاره مناسبې وبلل شوې، لیدنه وکړه.
همدارنګه، د هریرود مرغاب سیندیزې حوزې عمومي رئیس د یادو ولسوالیو له اوسېدونکو سره هم وکتل او د هېواد د اوبو سرچینو د مدیریت په برخه کې د اوبو او انرژي وزارت د پلانونو په هکله یې هر اړخیزې خبرې وکړې.
