کابل کې مېشت د روسیې سفارت استازي او د درېیو معتبرو روسي شرکتونو مسؤلینو په افغانستان کې د اوبو او انرژي په پروژو کې پانګونې ته چمتووالی څرګند کړ
نن، چهارشنبه، د ۱۴۰۴ هـ. ل کال د تلې د میاشتې ۲۳ د اوبو او انرژي وزارت د انرژي معین محترم الحاج ملا عبدالهادي یعقوب او ورسره مل د دغه وزارت یو شمېر تخنیکي رئيسانو د انرژي معینیت د غونډو په تالار کې په کابل کې د روسیې سفارت د استازي او د اوبو او انرژي په سکتور کې د روسي فعالو شرکتونو له یو شمېر مسؤلینو سره وکتل او خبرې، اترې وکړې.
په دغه لیدنه کې، د روسیې سفارت استازي او د روسي شرکتونو مسؤلینو په افغانستان کې په بنسټیزو پروژو په ځانګړې توګه د اوبو لېږد برخو، د اوبیزوبندونو جوړولو او برېښنا د تولید په پروژو کې د پانګونې لېوالتیا څرګندولو ترڅنګ، په دغو برخو کې د خپل هېواد د همکاري پر بشپړ چمتووالي باندې ټینګار وکړ. هغوی له پنجشیر څخه کابل ته د اوبو لېږد پروژه د اړینو او حیاتي طرحو څخه وبلله او په پلي کولو کې یې خپله جدي لېوالتیا څرګنده کړه.
همدارنګه، د وزارت د انرژي معین او تخنیکي رئیسانو، د روسي لوري د دغه تصمیم او لېوالتیا د هرکلي ترڅنګ، له هغوی سره د نوموړو پروژو په هکله کلي معلومات شریک کړل او ډاډ یې ورکړ، چې د اوبو او انرژي وزارت په دغو برخو کې د هر ډول تخنیکي همکاري او د پانګونې اړوند بهیرونو د آسانتیاوو په برخه کې چمتو دی.
د انرژي معین او تخنیکی رئيسانو یادونه وکړه، چې په اوسنیو شرایطو کې، افغانستان د پراخو طبیعي سرچینو او د پانګونې لپاره د مناسبو فرصتونو درلودونکی دی او د افغانستان اسلامي امارت هم د اوبو او انرژي سکتورونو د ودې او پراختیا په برخه کې د هر مثبت اقدام هرکلی کوي، او په دې برخه کې به اړینه همکاري وکړي.
په پای کې، دواړو لورو د اړوندو بنسټونو ترمنځ د اړیکو پراخولو اوپر لا همغږیو باندې ټینګار وکړ او هوکړه یې وکړه، چې د چارو د چټک پرمخ وړلو په موخه دې په نږدې راتلونکې کې د دواړو لورو ترمنځ تخنیکي ناستې ترسره شي، ترڅو د عملي او اغېزمنو همکاریو لپاره زمینه چمتو شي.
