په غزني ولایت کې د شینکي ۹ کاریزونو د چکډیمونو د پروژې چارې ۸۰ سلنه بشپړې شوې دي
۱۴۴۸/۴/۲۵هـ. ق مطابق۱۴۰۵/۷/۱۶هـ .ل
د غزني ولایت د سیندیزې فرعي حوزې ریاست مسؤلینو د دغه ولایت په ګیلان ولسوالي کې د شینکي ۹ کاریزونو د چکډیمونو پروژو د چارو له بهیر څخه څارنه وکړه.
د یادو پروژو چارې چې د ۱۸ میلیونه، ۹۵۰ زره او ۳۴۵ افغانیو په لګښت پرمخ وړل کېږی، تر اوسه پورې ۸۰ سلنه بشپړې شوې، چې د چارو په بشپړېدو سره به یې ۸۰ زره متر مکعب اوبه زېرمه او د ځمکې لاندې اوبه هم تغذیه شي.
همدارنګه، د غزني سیندیزې فرعي حوزې ریاست مسؤلینو په ګیلان ولسوالي کې د مقرب کوچني بند د چارو له بهیر څخه څارنه وکړه.
د یادې پروژې چارې چې د ۵ میلیونه او ۲۰۰ زره افغانیو په لګښت پرمخ وړل کېږي، تر اوسه پورې ۴۵ سلنه بشپړې شوې دي.
یاد بند د ۸ متره په لوړوالي او د ۱۰۱ متر په اوږدوالي سره جوړیږي، چې د چارو په بشپړېدو سره به یې ۶۰ زره متر مکعب اوبه زېرمه شي.
