په عدلیې وزارت کې د انرژي د سپما په هکله د پوهاوي ورکولو برنامه ترسره شوه
دغه برنامه د اوبو او انرژي وزارت له لوري په عدلیې وزارت کې د انرژي د اغېزمنتیا، ساتنې او سپما په هکله ترسره شوه، چې پکې د عدلیې وزارت ګڼ شمېر کارمندانو ګډون درلود.
په دغه برنامه کې د انرژي د اغېزمنتیا آمر محترم انجنیر فضل الرحیم سلطاني او د انرژي د اغېزمنتیا متخصص محترم انجنیر محمد فردین هاشمي د پرزنټیشن په وړاندې کولو سره په مفصله توګه د انرژي د مدیریت، د انرژي سپما د ارزښت او د انرژي سپما د ډولونو په هکله ګډونوالو ته معلومات وړاندې کړل او د دغې برنامې ترسره کول یې د پوهاوي ورکول او له انرژي څخه د غوره او اغېزمنې ګټې اخیستنې ترویج وباله.
د یادونې وړ ده، چې د انرژي سپما د پوهاوي ورکولو برنامه د اوبو او انرژي وزارت له لوري تر دې مخکې په څو نورو وزارتونو کې ترسره شوې او په راتلونکي کې به هم دوام ومومي.
