په جوزجان ولایت کې د علي آباد عمومي کانال د جوړولو پروژه د څه باندې اته میلیونه افغانیو په ارزښت ګټې اخیستنې ته وسپارل شوه
د جوزجان ولایت په فیض آباد ولسوالي کې د علي آباد عمومي کانال د جوړولو پروژه د اته میلیونه، دوه سوه نه پنځوس زره، نه سوه او یو شپیته(8259961) افغانیو په ارزښت د جوزجان سیندیزې فرعي حوزې رئيس ښاغلي ملا سعدالدین حلیمي، په شمال زون کې د سويډن موسسې رئيس او یو شمېر نورو سیمه ییزو مسؤلینو په شتون کې ګټې اخیستنې ته وسپارل شوه.
یاد کانال د بزګرانو د حاصلاتو د سطحي د لوړولو او د اوبو د ضایعاتو د مخنیوي لپاره جوړ شوی چې د ۸۰۰ هکتاره کرنیزې ځمکې د خړوبولو وړتیا لري.
یاده پروژه چې په شمال زون کې د سويډن کمیتې د موسسې په مالي ملاتړ د جوزجان سیندیزې فرعي حوزې تر څارنې لاندې پلې شوې، پکې د ګڼو کسانو لپاره د څلورو میاشتو په موده کې د کار زمینه برابره شوې وه.
