هغه څلور ورځنی ورکشاپ چې د ځمکې لاندې اوبو د انجنیرانو د وړتیا لوړونې په موخه په لاره اچول شوی و، پای ته ورسېد
د ځمکې لاندې اوبو انجنیرانو د وړتیا لوړونې ورکشاپ د پای ته رسېدو برنامه، نن د ځمکې لاندې اوبو رئيس محترم انجنیر عزیز الرحمن عزیز، د اطلاعاتو او نشراتو رئيس محترم الحاج غلام جیلاني حق پرست او د منځنۍکابل سیندیزې فرعي حوزې رئيس محترم مولوي ولي محمد تائب په ګډون ترسره شوه.
د دغه ورکشاپ د پای ته رسېدو په برنامه کې، د اطلاعاتو او نشراتو رئيس محترم الحاج غلام جیلاني حق پرست د هېواد آبادولو په برخه کې د فردي او ټولنیز مسؤلیت د ترسره کولو او په غوره توګه د ورسپارل شوو دندو د ترسره کولو په هکله په هر اړخیزه توګه خبرې وکړې او د دغه ورکشاپ ګډونوال یې وهڅول چې خپلې دندې په اخلاص او پوره امانتدارۍ سره پرمخ یوسي.
په ورته مهال، د دغه ورکشاپ یو تن ګډونوال محترم انجنیر ځدران امیني د دغه ډول ورکشاپونو جوړول د خپلې وړتیا لوړونې په برخه کې اغېزمن او ارزښتناک وګڼل او د اوبو او انرژي وزارت له رهبري څخه یې د دغه ډول لازیاتو ورکشاپونو د ترسره کولو غوښتنه وکړه.
په دغه ورکشاپ کې د سیندیزو حوزو انجنیرانو ته د ځمکې لاندې اوبو په بېلابېلو برخو کې په تیوري او عملي توګه د ځمکې لاندې اوبو ریاست د مسؤلینو له لوري د څلورو ورځو په موده کې ښوونه ورکړل شوه.
د یادونې وړ ده، چې د دغه ورکشاپ په پای کې د سیندیزو حوزو انجنیرانو ته تصدیق پاڼې هم ورکړل شوې.
غونډه د منځنۍ کابل سیندیزې فرعي حوزې رئيس محترم مولوي ولي محمد تائب له خوا په دعا سره پای ته ورسېده.
