میدان وردګ ولایت کې یو چکډم د 4.5 میلیونه افغانیو په ارزښت ګټې اخیستتنې ته وسپارل شو
د میدان وردګ ولایت د دایمیرداد ولسوالي په دوراني کلي د یوه چکډم پروژې چارې د 4.5 میلیونه افغانیو په ارزښت بشپړې او د میدان وردګ ولایت د والي محترم قاري بختیار معاذ، د میدان ښار سیندیزې حوزې رئيس محترم مولوي عبدالصمد حلیم او یو شمېر نورو سیمه ییزو مسؤلینو په شتون کې ګټې اخیستنې ته وسپارل شو.
د میدان ښار سیندیزې حوزې رئيس د نوموړي چکډم ګټې ته د سپارلو په غونډه کې وویل چې تېر کال د اسلامي امارت د رهبري له لوري د میدان وردګ ولایت په هرې ولسوالي کې د یوه چکډم د پروژې پلي کول په پام کې نیول شوی وو او دغه یې وروستي چکډم دی، چې ګټې اخیستنې ته سپارل کېږي.
په ورته مهال، د میدان وردګ والي هم د دغه چکډم ګټې ته د سپارلو په غونډه کې څرګنده کړه، چې اسلامي امارت کومې ژمنې چې له ملت سره د پراختیایي پروژو د پلي کولو په برخه کړې وي، ژمن دی.
دغه چکډم د ۵۶ متره په اوږدوالي او ۸ متره لوړوالي سره د اوبو او انرژي وزارت له پراختیایي بودجې څخه د میدان ښار سیندیزې حوزې تر څارنې لاندې د سیلابونو د ویجاړیو د مخنیوي او د ځمکې لاندې اوبو د پیاوړتیا په موخه جوړ شوی دی.
