لغمان ولایت کې د څه باندې۷۱ زره آمریکایي ډالرو په ارزښت د یوه محافظتي دېوال د جوړېدو چارې پيل شوې
د لغمان ولایت د علینګار ولسوالي اړوند د کوټاخیلو په سیمه کې د یوه محافظتي دېوال(بولډروال) د جوړېدو چارې د یو اویا زره، اووه سوه او شپږ پنځوس (۷۱۷۵۶ ) آمریکایي ډالرو په ارزښت د لغمان والي محترم قاري زین العابدین عابد، د لغمان سیندیزې فرعي حوزې رئيس محترم مولوي شیرجان راشدي او یو شمېر نورو سیمه ییزو مسؤلینو په شتون کې پيل شوې.
نوموړی دېوال ۷۰۰ متره اوږدوالی او ۳.۵ متره لوړوالی لري، چارې به یې د درې میاشتو په موده کې بشپړې او سلګونه جریبه ځمکه به د سیلابونو له ګواښ څخه خوندي شي.
د دغې پروژې چارې د یو ان ډې پې سازمان په مالي ملاتړ د لغمان سیندیزې فرعي حوزې تر څارنې لاندې پرمخ وړل کېږي.
