لغمان ولایت کې د دوو چکډمونو چارې ۹۵ سلنه پرمخ تللې دي
د لغمان ولایت د اوبو او انرژي رئيس محترم مولوي شیرجان راشدي او ورسره مل د دغه ریاست تخنیکي سلاکار د لغمان ولایت په قرغیو ولسوالي کې د ترهکي او بچه ترانق چکډمونو د چارو له بهیر څخه څارنه وکړه او اړوندو مسؤلینو ته یې د چارو د غوره کیفیت او پرمخ وړلو په موخه اړینې لارښوونې وکړې.
د دغو چکډمونو د چارو په بشپړېدو سره به زیاته اندازه باراني او سیلابي اوبه کنټرول او د اړوندو سیمو د خلکو کورونه د سیلابونو له ګواښونو څخه خوندي شي.
د نوموړو چکډمونو چارې چې د اېف، اې، او موسسې په مالي لګښت د ۲۰۰ زره آمریکایي ډالرو په لګښت د لغمان ولایت د اوبو او انرژي ریاست تر څارنې لاندې پرمخ وړل کېږي، ۹۵ سلنه بشپړې شوې او ډېر ژر به ګټې اخیستنې ته وسپارل شي.
