لغمان ولایت کې د توپاک کانال د سربند د بیارغونې پروژه د څه باندې ۵ میلیونه افغانیو په لګښت پیل شوه
د لغمان ولایت په علینګار ولسوالي کې د توپاک کانال د سربند د بیارغونې پروژه د ۵ میلیونه، ۳۶۰ زره او ۵۵۷ افغانیو په لګښت د لغمان د اوبو او انرژي رئيس محترم مولوي شیرجان راشدي او یو شمېر قومي مشرانو په شتون کې پیل شوه.
ښاغلي راشدي د دغې پروژې په پرانیست غونډه کې د نوموړې پروژې د تخنیکي مشخصاتو، ټولنیز او اقتصادي ارزښت په هکله اړین معلومات وړاندې کړل.
د نوموړي کانال سربند 12.8 متره اوږدوالی او 10 متر سور لري، چې د چارو په بشپړیدو سره به یې ۸۰ هکتاره کرنیزه ځمکه خړوبه شي.
په دغه پروژه کې ګڼ شمېر کسانو ته د کار زمینه چمتو شوې او چارې به یې د درې میاشتو په موده کې بشپړې او ګټې اخیستنې ته وسپارل شي.
د نوموړې پروژې چارې د ډبلیو. اف. پي سازمان په مالي لګښت د لغمان د اوبو او انرژي ریاست تر څارنې لاندې پرمخ وړل کیږي.
د یادونې وړ ده، چې څو ورځې مخکې په لغمان ولایت کې د اوبو زېرمو او پایپ سکیم ۱۹ پروژو او د لټر آباد کانال د سربند د بیارغونې پروژې چارې د څه باندې ۵۰ میلیونه افغانیو په لګښت پيل شوې.
