غزني ولایت کې د کامل کانال پروژه د څه باندې ۷ میلیونه افغانیو په لګښت بشپړه او ګټې اخیستنې ته وسپارل شوه
د غزني ولایت مرکز اړوند د کامل کانال پروژه د غزني د اوبو او انرژي رئیس مولوي محمد شفیق منصورعمر، د کامل کانال د شورا رئیس حاجي محمد اکبر او د ګڼ شمېر سیمه اییزو اوسېدونکو په شتون کې ګټې اخیستنې ته وسپارل شوه.
نوموړی کانال چې د سلطان بند د لویو او مهمو کانالونو څخه دی، د جوړولو چارې یې د یو، اېن، اېف، اې، او مؤسسې لخوا د ۷ میلیونه او ۴۳۷ زره او ۸۰ افغانیو په لګښت چې چارې یې د غزني ولایت د اوبو او انرژي ریاست تر څارنې لاندې پرمخ وړل کېدې، د ۸ میاشتو په موده کې بشپړې شوې.
دغهٔ کانال د ۱۲۰۰ متره اوږدوالي او ۱.۵ متره پلنوالي او ۱.۵ متره لوړوالي په درلودلو سره، د ۱۰۰۰ هکټاره کرنیزې ځمکې د خړوبولو وړتیا لري.
د نوموړي کانال په مسیر کې د موټرونو لپاره ۳ لوی پلونه ، د پلي تګ لپاره ۹ کوچني پلونه، د اوبو لګولو ۹ لويې او ۱۰ کوچنۍ دروازې هم جوړې شوې دي.
