د ۲۰۰ میګاواټه بادي برېښنا د تولید په پروژه کې د پانګونې لپاره د ګډې همکاري هوکړه لیک د ۷۷ ترکي ودانیز شرکت سره لاسلیک شو
د اوبو او انرژي وزارت سرپرست وزیر محترم ملا عبداللطیف منصور په هرات ولایت کې د ۲۰۰ میګاواټو په وړتیا د بادي سرچینو څخه د برېښنا د تولید په پروژه کې د پانګونې په موخه د ۷۷ ترکي ودانیز شرکت له رئيس محترم سلیمان جیلیو سره د همکاري هوکړه لیک لاسلیک کړ.
د یاد هوکړه لیک د لاسلیکولو په مراسمو کې د اوبو او انرژي وزارت د اوبو معین محترم مجیب الرحمن عمر آخندزاده، د ۷۷ ترکي ودانیز شرکت مرستیال محترم بوراک اونسال، د ترکیې سفارت مرستیال محترم امره مناو، د ترکیې د سفارت د سوداګرۍ آتشه محترم امره اونال او د اوبو او انرژي وزارت سلاکارانو او رئيسانو هم ګډون درلود.
د اوبو او انرژي وزارت سرپرست وزیر د یاد هوکړه لیک د لاسلیکولو پر مهال له دغه وزارت سره د ۷۷ ترکي ودانیز شرکت له مخکنیو همکاریو په ځانګړې توګه د کندهار ولایت د لمریزې برېښنا پروژې او د نوموړي شرکت له لوري د کجکي بند د دوهم فاز پروژې د پلې کېدو ستاینه وکړه او همدارنګه یې یاد هوکړه لیک په هېواد کې د انرژي د تولید د پراختیا په برخه کې د افغانستان د خلکو لپاره ارزښتناک وباله.
په ورته مهال، د ۷۷ ترکي ودانیز شرکت رئيس د اوبو او انرژي وزارت د رهبري څخه د مننې ترڅنګ ژمنه وکړه چې په افغانستان کې به د اوبو او انرژي په پروژو کې خپلې پانګونې پراخې کړي.
همداراز هغه د ترکیې هېواد د سوداګرۍ ټولنې د رئيس په توګه د رسنیو له لوري د خپل هېواد پانګوالو ته د بلنې ترڅنګ ډاډ ورکړ، چې اوسمهال په افغانستان کې تر ټولو ښه کاري فرصت د امن او خلوص په چاپيریال کې چمتو شوی او د افغانستان اسلامي امارت د خپلو ژمنو سره سم، د پانګه اچوونکو مالي حقوق په خپل وخت او ښه طریقه ادا کوي.
د یادونې وړه ده چې د یاد هوکړه لیک له مخې د اوبو او انرژي وزارت او ۷۷ ترکي ودانیز شرکت تخنیکي مسؤلین په هرات ولایت کې له بادي سرچینو څخه د ۲۰۰ میګاواټه برېښنا د تولید د پروژې د پلې کولو لپاره د اړینو مطالعاتو او څېړنو د ترسره کولو په موخه خپلې ګډې همکاري پیلوي.
د برنامې په پای کې د انرژي د برنامو رئيس محترم انجنیر فرهاد محمودي د خبریالانو پوښتنو ته اړین ځوابونه ورکړل.
