د یوه روسي او افغان شرکتونو مسؤلینو د اوبو او انرژي په پروژو کې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د میتاخیم روسي شرکت له رئيس ښاغلي پیوتر الکساندرویچ او د سولې شرکت له رئيس محترم انجنیر نجیب الله صادق سره وکتل او په افغانستان کې د اوبو او انرژي په پروژو کې د پانګونې په هکله بحث او د اندونو تبادله وکړه.
د نوموړو شرکتونو رئيسانو په دغه لیدنه کې د اوبو او انرژي په پروژو کې پانګونې ته لېوالتیا څرګنده او په دې برخه کې د همکاري غوښتنه وکړه.
د اوبو او انرژي سرپرست وزیر په دغه لیدنه کې د نوموړو شرکتونو له رئيسانو سره د پانګونې لپاره د زمینې د چمتو کولو په برخه کې د هر راز همکاري ژمنه وکړه او هغوی ته یې وړاندیز وکړ، چې د شاه توت للندر بند او له پنجشیر څخه کابل ته د اوبو د لېږد په پروژو کې پانګونې وکړي او زیاته یې کړه، چې اوسمهال په افغانستان کې د پانګونې لپاره له هره پلوه زمینه چمتو شوې ده.
همدارنګه، د دغې ناستې په پای کې پریکړه وشوه، چې د نوموړو شرکتونو تخنیکي ټیمونه دې د وزارت له تخنیکي ټیم سره د پروژو د تخنیکي مسائلو په هکله خبرې وکړې، تر څو د عملي چارو د پیل لپاره زمینه چمتو شي.
