د یتیمانو پر شونډو د موسکا خورولو د شيبې په لټه
د اوبو او انرژي وزارت سرپرست وزیر محترم ملا عبداللطیف منصور څو شیبې د خاتم الانبیا دارالایتام له ۴۵ تنو زده کوونکو سره د قرغې بند په تفریح ځای کې تېرې کړې.
د اوبو او انرژي وزارت سرپرست وزیر د کابل تفریحي ځایونو ته د نوموړو یتیمانو لپاره د سفر زمینه، هغوی ته د خوښۍ د زمینې چمتو کول وبلل.
ښاغلي منصور د یتیمانو لاس نیوی یو له دیني او انساني مسؤلیتونو څخه وګاڼه او ټینګار یې وکړ چې هر څوک باید د خپل توان له مخې له یتیمانو او بېوزلو سره مرسته وکړي.
په ورته مهال، د خاتم الانبیا دارالایتام مسؤل مولوي عبدالباري احمد د اوبو او انرژي وزارت د سرپرست د همکاري او شفقت ستاینه وکړه او دغه سفر يې د نوموړي دارالایتام د زده کوونکو لپاره د علمي او تفریحي سیر په برخه کې ارزښتناک و باله.
د یادونې وړ ده، چې د خاتم الانبیا دارالایتام په ۱۴۴۱ ه ق کال کې د پکتیا ولایت په زرمت ولسوالي کې د اوبو او انرژي وزارت د سرپرست وزیر محترم ملا عبداللطیف منصور له لوري د ښوونې او علمي ودې په موخه د هغو کسانو د زامنو لپاره چې د دین او هېواد په لاره کې په شهادت رسېدلي دي، جوړ شوی چې اوسمهال هلته څه باندې ۱۲۰ تنه په زده کړو بوخت دي.
