د هلمند ولایت د کجکي بند د دوهم فاز پروژې د قرارداد د څیړلو په هکله د سترو قراردادونو د څیړلو د رهبري پلاوي غونډه ترسره شوه
د تیرو غونډو په دوام، یاده غونډه هم د اوبو او انرژي وزارت سرپرست ښاغلي ملا عبداللطیف منصور تر مشري لاندې، د اوبو معین ښاغلي مجیب الرحمن عمر آخندزاده، د انرژي معین ښاغلي ملا عبدالقاهر ادریس، د کلیو بیارغونې او پراختیا وزارت معین ښاغلي مفتي سید احمد مستقیم، د اقتصاد وزارت معین ښاغلي ډاکټر عبداللطیف نظري، د ټولګټو وزارت معین ښاغلي عبدالکریم فاتح، د ملي تدارکاتو ریاست مرستیال ښاغلي شیخ عبدالرحیم رحیمي، د ۷۷ ترکي شرکت استازي ښاغلي بوراک اونسال او د سترو قراردادونو د څیړلو پلاوي د تخنیکي ټیم په ګډون ترسره شوه.
په یاده غونډه کې، د اوبو او انرژي وزارت او د قراردادي شرکت استازي د کجکي بند د دوهم فاز پروژې قرارداد د تطبیق په هکله د بحث او اندونو تر تبادلې وروسته، په مترقبه او غیر مترقبه حالاتو کې له یو بل سره د ګډې همکاري ژمنه وکړه.
همدارنګه، په دې غونډه کې د برېښنا شرکت اړوند په مزارشریف کې د ګازو حرارتي برېښنا د پلور پروژه هم وڅیړل شوه او پریکړه وشوه، چې د تخنیکي فرعي کمیټې وړاندیزونه د تائید وړ دي او د وروستۍ پریکړې لپاره دې اقتصادي کمیسیون ته ولیږل شې.
