د عزیزي ګروپ شرکت له استازو سره د انرژي په پروژو کې د پانګونې په موخه د همغږي ناسته ترسره شوه
له بېلابېلو سرچینو څخه د انرژي تولید په پروژو کې د پانګونې په چارو کې د آسانتیاوو د رامنځته کولو په موخه، یوه ناسته د اوبو او انرژي وزارت د پایدارې انرژي عمومي رئيس محترم مولوي عبدالرحمن رحماني، د پانګونې د جلب او جذب رئيس محترم مولوي رحمتولي رحماني، د وزارت د تخنیکي مسؤلینو او د عزیزي ګروپ شرکت د استازو په شتون کې د انرژي معینیت د غونډو په تالار کې ترسره شوه.
په دغه ناسته کې، د انرژي په برخه کې د عزیزي ګروپ شرکت د پانګونې لېوالتیا ، د دغو طرحو د ترسره کولو په موخه د اړینو همکاریو او د پروژو لومړیتوبونو په هکله بحث او د اندونو تبادله وشوه.
د عزیزي ګروپ استازو وویل، دغه شرکت هوډ لري چې په اوږدمهاله کې په افغانستان کې له بېلابېلو سرچینو څخه نږدې ۱۰ زره مېګاواټه برېښنا تولید کړي. هغوی زیاته کړه، چې د دغې پانګونې لپاره یې بشپړ پلان چمتو کړی او په لومړي قدم کې د ډبرو سکرو او ګاز سرچینو څخه د برېښنا تولید پروژو ته لومړیتوب ورکوي.
په ورته مهال، د اوبو او انرژي وزارت د پایدارې انرژي عمومي رئيس او د پانګونې د جلب او جذب رئيس د دغه نوښت هر کلی وکړ او ټینګار یې وکړ، چې په افغانستان کې د پانګونې لپاره اړینې زمینې چمتو شوې او د انرژي د تولید لپاره کافي سرچینې شتون لري. هغوی د انرژي پروژو ارزښت او د خلکو هیلو ته په اشارې سره د دغو طرحو پلي کولو د چارو پر چټکتیا باندې ټینګار وکړ.
د ناستې په پای کې، دواړو لورو ژمنه وکړه، چې د دغو پروژو د چارو د پرمخ وړلو په برخه کې لا اړینې همغږي او همکاري ترسره کړي.
