د سیندیزو حوزو د ځمکې لاندې اوبو د انجنیرانو د وړتیا لوړولو په موخه څلور ورځنی ورکشاپ پیل شو
دغه ورکشاپ چې د اوبو او انرژي وزارت د اوبو معین محترم مجیب الرحمن عمر آخندزاده او د دغه وزارت د یو شمېر رئيسانو په ګډون پيل شو، پکې د سیندیزو حوزو نږدې ۳۰ تنه انجنیرانو ګډون درلود.
د اوبو ښاغلي معین د دغه ورکشاپ په پیل کې د آیاتونو او روایتونو په استناد سره د اوبو حیاتي اهمیت ته په لنډ ډول نغوته وکړه او په هېواد کې د اوبو د مدیریت لپاره خدمت د مادي او معنوي ارزښتونو در لودونکی وګاڼه.
په ورته مهال، د ځمکې لاندې اوبو د سرچینو رئيس محترم انجنیر عزیزالرحمن عزیز د دغه ورکشاپ د موخو په هکله خبرې وکړې او ویې ویل، چې انجنیرانو ته په دغه ورکشاپ کې د څلورو ورځو په موده کې د ځمکې لاندې اوبو په بېلابېلو برخو کې په تیوري او عملي بڼه ښوونه ورکول کېږي.
همدارنګه د کابل سیندیزې حوزې عمومي رئیس محترم حبیب الرحمن حقپال د ځمکې لاندې اوبو وضعیت ته اشاره وکړه او ټینګار یې وکړ چې د ځمکې لاندې اوبو موضوع باید جدي ونیول شي او ټول یې باید په مدیریت کې برخه واخلي.
د یادونې وړ ده، چې دغه ورکشاپ د یونسیف په مالي همکاري په لاره اچول شوی او څه موده وړاندې هم د سطحي اوبو د مدیریت په هکله د سیندیزو حوزو د انجنیرانو لپاره یو څلور ورځنی ورکشاپ په لاره اچول شوی وو.
