د سمنګان له مرستیال والي سره د برېښنا د ورکړي د پروسې په هکله خبرې وشوې
د اوبو او انرژي وزارت د برېښنا مارکیټ حقوقي رئيس محترم الحاج محمد حارث زرمتي او ورسره مل ټیم د سمنګان له مرستیال والي محترم ملا داد خدا خادم سره وکتل او د برېښنا د ورکړي د پروسې او پر هغه شرکتونو باندې چې په دغه ولایت کې د برېښنا د تولید او وېش په برخه کې فعالیت کوي د برېښنا انرژي د قانون د پلي کولو په هکله خبرې، اترې وکړې.
په دغه لیدنه کې، د برېښنا مارکیټ حقوقي رئيس وویل چې په هېواد کې د برېښنا تنظیم او د کمیت او کیفیت تضمین د برېښنا خدمتونو د تنظیم د عمومي ریاست له وظیفوي صلاحیتونو واکونو څخه دی او دغه ولایت ته یې د خپل سفر موخه د برېښنا رسونې شرکتونو ارزونه او پېژندنه وبلله.
د سمنګان مرستیال والي د اوبو او انرژي وزارت لېږل شوي پلاوي ته د ښه راغلاست ترڅنګ وویل، له شکه پرته په هېواد کې د برېښنا رسونې شرکتونو ثبت او راجستر کولای شي چې د برېښنا په مارکیټ کې نظم او ډسپلین رامنځته کړي او د برېښنا وړاندې کوونکي به معیاري شي او د سمنګان ولایت رهبري د شرکتونو د ثبت او راجستر په برخه کې هر اړخیزه همکاري کوي.
همدارنګه، د اوبو او انرژي وزارت لېږل شوي پلاوی او ورسره مل د سمنګان ولایت د ښاروالي، صنعت او سوداګري او برېښنا مسؤلینو د بېلګې په توګه د ایبک په ښار کې د یو شمېر مارکیټونو څخه لیدنه وکړه او ځینې مارکیټونو چې جنراتوري او سولري سیسټمونه درلودل ورته سپارښتنه وشوه چې ډېر ژر دې خپل سولري او جنراتوري سیسټمونه قانوني کړي .
په پای کې د سمنګان ولایت د نوموړو ریاستونو مسؤلینو د اوبو او انرژي وزارت له لېږل شوي پلاوي سره ژمنه وکړه که چېرې په سمنګان ښار او ولسوالیو کې جنراتوري شبکې یا اوبیزې او سولري سیسټمونه یې ترسترګو شي ورته به د قانوني کېدو سپارښتنه وکړي.
