د سترو پروژو د څېړنې ناسته د اوبو او انرژي وزارت د اوبو په معینیت کې ترسره شوه
یاده ناسته د اوبو او انرژي وزارت د اوبو معین ښاغلي مجیب الرحمن عمر آخندزاده تر مشري لاندې د وزارتونو د معینانو او اړوندو ادارو د استازو په ګډون ترسره شوه.
په یاده ناسته کې، په لغمان ولایت کې د شاهي کانال د پروژې په هکله چې د اوبو او انرژي وزارت پورې اړوند ده، بحث او د اندونو تبادله ترسره شوه او پرېکړه وشوه چې د بودجې د شتون په صورت کې دې د پروژې چارې ډېر ژر پيل او د وزارت تخنیکي مسؤلین دې د ډیزاین او تخنیکي مطالعاتو چارې بشپړې کړي.
همدارنګه د ناستې په دوام کې د ټولګټو وزارت د پروژو لکه د جوزجان – سرپل سړک او د ایبک ، مزارشریف، میمنې، فراه او زرنج ښارونو د داخلي سړکونو په هکله بحث او د اندونو تبادله ترسره شوه.
د یادولو وړ ده، چې یاد پلاوی د افغانستان اسلامي امارت د کابینې له لوري ټاکل شوی، ترڅو ټول ستر قراردادونه تر څېړنې او مطالعې لاندې ونیسي او په پای کې د خپلې څېړنې پایلې په یوه بشپړ راپور کې د افغانستان اسلامي امارت اقتصادي کمیسیون ته وړاندې کړي.
