د سترو پروژو د قراردادونو د څېړنې د رهبري په ناسته کې د ۱۲ پروژو قراردادونه وڅېړل شول
دغه ناسته د اوبو او انرژي وزارت د اوبو معین محترم مجیب الرحمن عمر آخندزاده تر مشري لاندې د ټولګټو وزارت د معین محترم مولوي عبدالکریم فاتح، د کلیو بیارغونې معین محترم شراف الدین مسلم، د چارو ملي ادارې د تدارکاتو معین محترم شیخ عبدالرحیم رحیمي، د ملي پراختیا شرکت مرستیال او د اوبو او انرژي وزارت او اړوندو وزارتونو د یو شمېر رئيسانو په شتون کې ترسره شوه.
په دغه ناسته کې، په تخار ولایت کې د نمک آب پروژې مسیر د سمون، له ترینکوټ څخه د کندهار تر شاه ولیکوټ ولسوالي پورې د ۲۴ کیلومترو په اوږدوالي سره د سړک جوړولو پروژې، د کابل پولي تخنیک پوهنتون د چاپیریال او اوبو د سرچینو د پوهنځي د تدریسي وداني د جوړولو پروژې، په نیمروز ولایت کی د ترک او خشک کانال جوړولو پروژې، د حامد کرزي د هوايي ډګر د دیوال جوړولو پروژې، د کابل سیند د استحکاماتو او پاکولو د لومړي او دوهم لاټ پروژې، د افغانستان د صکوکو مطبعې د جوړولو پروژې، د تاج بیګ ماڼۍ د بیارغونې پروژې، د کابل ښار د اوبو د مدیریت پروژې، په فراه ولایت کې د اوبو بند جوړولو او د نوي کانال د کېندلو پروژې او د مزاري د غونډو د تالار د لومړي فاز د ودانۍ جوړولو پروژې قراردادونه وڅېړل شول.
د سترو قراردادونو د څېړنې پلاوی به د یادو پروژو تر هر اړخیزې او بشپړې څېړنې وروسته، د خپلو څېړنو پایلې د وړاندیزونو او شونو حل لارو چارو سره یوځای د یوه بشپړ راپور په ترڅ کې د افغانستان اسلامي امارت له اقتصادي کمیسیون سره شریک کړي.
