د دعوت او ارشاد روزنیز او اصلاحي سمینار د شیخ القرآن و الحدیث محترم الحاج محب الله آخندزاده په ګډون ترسره شو
دغه سمینار چې د اوبو او انرژي وزارت د غونډو په تالار کې ترسره شو، پکې د اوبو او انرژي وزارت رئيسانو او ټولو کارمندانو ګډون درلود.
په دغه سمینار کې، شیخ القرآن و الحدیث محترم الحاج محب الله آخندزاده د انسانانو په ژوند کې د ښوونې او روزنې د بنسټیز ارزښت په هکله خبرې وکړې او ټینګار یې وکړ، چې ښوونه او روزنه هغه وخت ارزښت لري چې د قرآن کریم د لارښوونو او د پیغمبر(ص) د سنتو پر بنسټ وي.
ښاغلي آخندزاده په خپلو خبرو کې د تاریخي بېلګو په وړاندې کولو سره روښانه کړه، چې ښوونه او روزنه د اسلام د سپیڅلي دین د لارښوونو پر بنسټ د انسانانو د ژوند ټول اړخونه رانغاړي او د خدای(ج) د رحمت د نازلېدو لامل ګرځي.
هغه همدارنګه په دغه سمینار کې ټول کارمندان د اسلامي ارزښتونو مراعاتولو ته را وبلل اوټینګار یې وکړ، چې د بشر دنیوي او اخروي بریا یوازې او یوازې د اسلامي زده کړو په عملي کولو سره ترلاسه کېږي.
