د ترکي او افغاني شرکتونو مسؤلینو د برېښنا د تولید په پروژو کې د پانګونې لپاره لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د« جي اس پي او اکلتاش» شرکتونو له مسؤلینو سره وکتل او د ۹۰۰ میګاواټه په وړتیا د لمریزې، بادي او اوبیزې برېښنا د تولید په پروژو کې د پانګونې په هکله بحث او د اندونو تبادله وکړه.
په دغه لیدنه کې، د نوموړو شرکتونو مسؤلینو د ۹۰۰ میګاواټه په وړتیا د بېلابېلو سرچینو څخه د انرژي د تولید په پروژو او د هېواد دننه د برېښنا د انتقالي مزي په پراختیا کې د پانګونې لپاره لېوالتیا څرګنده او ژمنه یې وکړه، چې د انرژي سکتور د ماسټر پلان د نوي کېدو او پراختیا په برخه کې هم له دغه وزارت سره همکاري کوي.
د اوبو او انرژي سرپرست وزیر د هغوی د لېوالتیا د هر کلي ترڅنګ د پانګونې لپاره د زمینې د چمتوکولو په برخه کې د دغه وزارت له لوري د همکاري ډاډ ورکړ او د چارو د پرمخ وړلو لپاره یې د اړینو همغږيو پر چټکتیا باندې ټینګار وکړ.
ښاغلي منصور یادونه وکړه، چې په افغانستان کې د برېښنا د تولید لپاره کافي سرچینې شتون لري او په دې برخه کې پانګونه هم د پانګوال او هم د افغانستان د خلکو په ګټه ده.
