د برېښنا مارکیټ سوداګریز رئيس او ورسره مل پلاوي د پنجشیر له والي او د پنجشیر د اوبو او انرژي له رئيس سره وکتل
د اوبو او انرژي وزارت د انرژي معینیت د برېښنایي خدمتونو د تنظیم عمومي ریاست مربوط د برېښنا مارکیټ سوداګریز رئيس محترم محمد ایمل سهاک او مل پلاوي پنجشیر ولایت ته د یوه سفر په ترڅ کې د پنجشیر د اوبو او انرژي د رئيس محترم مولوي فضل الله عادل په ملتیا د پنجشیر له والي محترم حافظ محمد آغا حکیم سره وکتل.
په دغه لیدنه کې، نوموړي پلاوي د پنجشیر له والي سره د برېښنا د ښه تنظیم، د فعالو شرکتونو د پېژندنې او د هغوی د فعالیتونو د ارزونې له لارې د نوموړو شرکتونو د فعالیتونو د قانونيکولو، د تخنیکي خوندیتوب د مراعاتولو او د انرژي په سکتور کې د متشبثینو د هڅونې په هکله هر اړخیز معلومات وړاندې کړل.
همدارنګه، نوموړي پلاوي د پنجشیر له والي څخه وغوښتل چې نوموړي موضوع دې د ولایت په اداري ناسته کې هم مطرح شي، ترڅو د ولایت له آدرسه ټولو اړوندو ادارو ته ورسول شي.
په ورته مهال، د پنجشیر والي نوموړي پلاوي ته ډاډ ورکړ، چې په دې برخه کې به هېڅ ډول هڅه او کوښښ ونهسپموي.
له بلې خوا، د پنجشیر والي او د اقتصاد او صنعت او سوداګري رئيسانو د برېښنا مارکیټ سوداګریز رئيس ته د دغه ولایت د برېښنا ستونزې په ګوته کړې او زیاته یې کړه، چې د پنجشیر ولایت له اته ولسوالیو څخه درې ولسوالي برېښنا لري او پاتې ولسوالي د برېښنا له نعمت څخه بېبرخې دي او یادونه یې وکړه، چې پنجشیر ولایت د بادي، اوبیزې او لمریزې برېښنا په برخه کې د پانګونې لپاره ښه ښه بستر لري.
