د اوبو معینیت په اونېزه تخنیکي ناسته کې د سطحي اوبو ریاست د کړنو راپور و ارزول شو
دغه ناسته د اوبو او انرژي وزارت د اوبو معین محترم مجیب الرحمن عمر آخندزاده تر رهبري لاندې د دغه معینیت د رئيسانو، سلاکارانو او د اوبو سکټور د کارپوهانو په شتون کې ترسره شوه.
په دغه ناسته کې د سطحي اوبو رئيس د دغه ریاست د ۱۴۰۲ لمریز کال د کړنو راپور او د ۱۴۰۳ لمریز کال چمتو شوی کاري پلان د یوه پرزنټیشن په ترڅ کې وړاندې کړ او د ناستې په بهیر کې د نوموړي ریاست د کړنو د اجراآتو د څرنګوالي او په دې برخه کې د شته ننګونو د هوارولو په هکله بحث او د اندونو تبادله وشوه.
همدارنګه په دغه اونېزه تخنیکي ناسته کې د کابل عمومي سیندیزې حوزې اړوند په خوست او پکتیا ولایتونو کې د دوو چکډمونو د پروژو ګټې ته د سپارلو په وړاندې د شته ننګونو د هوارولو په هکله هم خبرې، اترې وشوې.
د اوبو محترم معین د نوموړو موضوعاتو په هکله د رئيسانو او کارپوهانو د اندونو او وړاندیزونو تر اورېدلو وروسته، د چارو د غوره پرمخ وړلو او چټکتیا په هکله اړوندو مسؤلینو ته اړینې لارښوونې وکړې.
